Sparebankstiftinga Fjaler tilset ny dagleg leiar
Sparebankstiftinga Fjaler har tilsett Leonora Laukeland Kleiven som ny dagleg leiar. Kleiven kjem frå stilling som Director of External Relations and Communications ved UWC Red Cross Nordic, og tek over etter Ole Anders Hope som går av med pensjon.
«Styret er særs nøgd med å få Leonora Kleiven på plass som ny dagleg leiar. Ho har solid kompetanse, stort engasjement for lokalsamfunn og verdigrunnlag som passar svært godt med oppdraget til Sparebankstiftinga Fjaler», seier styreleiar Ingar Valvik.
Det var stor interesse for stillinga, og Valvik understrekar at styret er godt fornøgd med både prosessen og utfallet.
«Vi har hatt ein grundig og god tilsetjingsprosess, og opplevde stor interesse for stillinga. No ser vi fram til oppstart og vil ha ein god overgang fram til Leonora er på plass i stillinga over sommaren. Eg gler meg til samarbeidet, både mellom dagleg leiar og styret, og er trygg på at vi har fått rett person til å vidareutvikle stiftinga», seier Valvik.
Han peikar vidare på rollen Sparebankstiftinga Fjaler har i utviklinga av lokalsamfunna i kommunen.
«Gjennom denne tilsetjinga får vi på plass ein dagleg leiar som kan bidra til å utvikle stiftinga vidare, med tydeleg fokus på å styrkje lokalsamfunna og gjere Fjaler til ein triveleg og attraktiv stad å bu og leve», seier han.
Den påtroppande daglege leiaren ser fram til å ta til i stillinga.
«Frå éin draumejobb til ein annan! Eg takkar for tilliten og gler meg til å ta fatt på rolla som dagleg leiar. Det å få vere med og vidareutvikle eit område eg er så glad i, betyr mykje for meg», seier Leonora Kleiven.
Ho peikar samstundes på både moglegheitene og ansvaret som ligg i rolla.
«Med Sparebankstiftinga Fjaler har vi ein unik moglegheit til å få positive ting til å skje. Samstundes er det eit stort ansvar å forvalte midlane på best mogleg vis. Det er litt skremmande, men aller mest utruleg motiverande. Eg ser veldig fram til å jobbe tett med styret og alle gode krefter for å utvikle og setje i gang gode idear til beste for lokalsamfunnet», avslutter Kleiven.
